سیا موی تو دَ گردی روی تو نوربن
بلن اسپی رسی گردوی تو نوربن
پیی پیرو گلی خامک کشیدی
سَوز دسمال بلی زانوی تو نوربن
ظ/س-ابوظبی 2012/11/3
لب و دندون تو ره آغو کنم گل
دو سیوی سرخ تو بلغو کنم گل
مرا شیفتِ جیگر بیگر که گرمه
یی نیکییای تو ره پلغو کنوم گل
ظ/س-ابوظبی2012/11/2
تو کهِ موری بلدیت دوا کَنم ما
بروم مازار... خُدا خُدا کَنم ما
تو کهِ موری دلم موره قد از تو
دیلی رافته ره کیِ پیدا کَنم ما؟
ظ/س-ابوظبی 2012/11/1
تو کهِ موری مره از غم بی غم کو
دَ پیش چیم خو دِست و پای مه جم کو
سری زانوی خو یک لاظه گرفته
امو چادر خو دَ چار سوی مه لم کو
ظ/س-ابوظبی2012/11/1
چَره اونگیت خجیل و پُر غباره؟
سیا موی تو پرگپاتو دو تاره!!!
دو بیتِ هر دو لب تو سور نمیگره
گمانیم دیل دَ "سینیت" بیقراره؟
ظ/س-ابوظبی 2012/10/31
دَ ای شاوا غدر دَ خاو مه مایی؟!
بلن مفتی وری دَ شاو مه مایی
سر و روی خو ره جم کیده تو نوربن
سراغی دیلی پُر ایناو مه مایی
ظ/س-ابوظبی 2012/10/30